Teatro de entroido en galicia

Loitas grupais: Fareladas, farrapadas e borralladas

  Na actualidade quedan en Galicia, como supervivencia das loitas grupais de Entroido, as fareladas de Verín, Xinzo da Limia e Viana do Bolo. Son loitas con farelos (fariña) que modernamente se fan no luns ou no domingo fareleiro, cos participantes vestidos con monos ou roupa vella e protexidos con máscaras, incluso de pintor ou de submarinista, para evitar que os farelos entren nos ollos e nas vías respiratorias. O costume da fariña é relativamente recente, xa que antes en moitos sitios se botaban uns a outros cinza (domingo ou luns borralleiro), ferruxe ou serraduras sucias.

  Tamén pervive no luns borralleiro de Laza a farrapada, loita na que os participantes se distribúen en dous grupos e lánzanse entre eles trapos de tela enchoupada en lama e bulleiro. Orixinalmente parece que fareladas e farrapadas eran loitas de sexos, sendo os homes os que acosaban as mulleres para emporcalas, costume tamén documentada en Portugal e no Brasil.